சார்பியல் தத்துவம் - சார்பு

சார்பியல் தத்துவம் - சுட்டிகள்

முன்னுரை 1.சார்பு
--------------------------------------------------
"உங்கள் வீடு இருப்பது வலப்பக்கமா, அல்லது இடப்பக்கமா?" என்று ஒருவர் உங்களைப் பார்த்து கேட்கிறார். இந்தக் கேள்விக்கு உங்களால் உடனே சரியாக பதிலளிக்க முடியும் என்று நினைக்கிறீர்களா? அல்லது அப்படியே நீங்கள் சரியாக பதிலளித்தாலும் கேள்வி கேட்டவர் அதை சரியாக புரிந்து கொள்வார் என்று நினைக்கிறீர்களா?

ரொம்ப கஷ்டம்! அதிர்ஷ்டவசமாக அப்படி நடந்தால்தான் உண்டு.

ஆனால் நீங்கள் இப்படி பதிலளிக்கிறீர்கள் என்று வைத்துக் கொள்ளுங்கள், "அந்த பிரிட்ஜிலிருந்து ரயில்வே கேட்ட நோக்கி வந்தீங்கன்னா வலது பக்கம்". அப்பொழுது உங்கள் பதில் ஒரு முழுமை பெறுகிறது. கேள்வி கேட்டவரும் சரியாக புரிந்து கொள்வார்.

அதாவது வலது, இடது என்பவை பற்றிப் பேசும் பொழுது அவை சார்பான திசையையும் நீங்கள் சொல்லியாக வேண்டும்.

ஆனால் "வண்டிகள் சாலையின் இடது பக்கம்தான் போகவேண்டும்" என்பது சாலை விதி. இங்கே திசை பற்றி ஏதும் சொல்ல வில்லை. ஆனாலும் நாம் சரியாக புரிந்து கொள்கிறோம். ஏன்? இங்கே வண்டியின் ஓட்டம் நமக்கு திசையை குறிப்பிட்டு சொல்லி விடுகிறது, மறைமுகமாக. வண்டி போகும் திசையை சார்ந்து இடது பக்கமாய் போகவேண்டும் என்று புரிந்து கொள்கிறோம்.

ஆகவே "வலம்", "இடம்" ஆகியவை சார்பான கருத்துக்கள்.

இப்பொழுது இரவா? பகலா?

இந்தக் கேள்விக்குரிய பதில், பதில் சொல்பவருடைய இடத்தை சார்ந்தது. பதில் சொல்பவர் நியூயார்க்கில் இருந்தால் இப்பொழுது இரவு என்று சொல்வார். ஒருவேளை அவரே சென்னையில் இருந்தால் அதே நேரத்தில் அதே கேள்விக்கு பகல் என்றுதான் பதிலளித்திருப்பார். இரண்டு விடையுமே தவறாகாது, இடத்தை சார்ந்து. ஏனென்றால் "இரவும்", "பகலும்" சார்பான கருத்துக்கள், இடத்தைப் பொறுத்து.

இப்பொழுது உங்களுக்கு சார்பு என்றால் என்னவென்று லேசாக புரிந்திருக்கும் என்று நினைக்கிறேன்.

- மீண்டும் பார்(அறு)ப்போம்